Bangkok qalasynda Qazaqstannyń Taılandtaǵy elshiliginiń bastamasymen Búkilálemdik býddıstter qoǵamdastyǵynyń shtab-páterinde Álemdik jáne dástúrli dinder lıderleriniń VI seziniń qorytyndylaryna arnalǵan «Qazaqstan men Taıland: konfesıaaralyq kelisimge qosqan úlesi» atty halyqaralyq konferensıa ótti.
Konferensıanyń negizgi ıdeıasy - Taılandtyń jurtshylyǵynyń nazaryn Qazaqstan Respýblıkasynyń ártúrli konfesıalar arasyndaǵy dıalogty damytý jáne jahandyq beıbitshilik pen kelisimdi nyǵaıtýdaǵy ózara is-qımylyn kúsheıtý jónindegi qyzmetine aýdarý, sondaı-aq osy saladaǵy tájirıbe almasý boldy. Konferensıaǵa memlekettik organdardyń, qoǵamdyq jáne akademıalyq toptardyń, dinı uıymdardyń, sondaı-aq Taılandtyń dıplomatıalyq korpýsy ókilderi qatysty.
Konferensıada elshi Raýshan Esbolatova quttyqtaý sózin sóılep, tyńdaýshylardy Álemdik jáne dástúrli dinder lıderleriniń VI sezi jumysynyń qorytyndylarymen tanystyrdy. Atap aıtqanda, Deklarasıanyń negizgi qaǵıdalary, sondaı-aq plenarlyq jáne seksıalyq otyrystarynyń taqyryptary ashyldy. Qazaqstan Respýblıkasy Prezıdentiniń usynǵan «Manıfes. «Beıbitshilik. XXI ǵasyr» atty qujatyna erekshe nazar aýdaryldy.
Sonymen birge, is-shara qatysýshylary Qazaqstan Respýblıkasy Prezıdentiniń túrli dinder, mádenıetter men órkenıetter arasyndaǵy beıbitshilik, kelisim jáne jemisti dıalogty qamtamasyz etýge baǵyttalǵan halyqaralyq platforma qurý jónindegi biregeı bastamasyn iske asyrý nátıjesi retindegi Sıeziń tarıhymen tanystyryldy.
Atalǵan halyqaralyq is-sharaǵa Taılandtyń atynan qatysqan Búkilálemdik býddıstter qaýymdastyǵy prezıdentiniń keńesshisi T.Sýcharıkýl jáne Dúnıejúzilik beıbitshilik ýákili keńsesiniń Bas hatshysy P. Tovıvıch Álemdik jáne dástúrli dinder lıderleriniń VI sezi jumysyna qatysty óz pikirlerimen bólisti. Delegattar Sıeziń ózara senim men syılastyq atmosferasyn qalyptastyrý maqsatynda dinı jáne saıası lıderlerdiń kúsh-jigerin biriktirý boıynsha bastamasyna qoldaý bildirdi. Bul olardyń pikirinshe tartysty jaǵdaılady boldyrmaýǵa kómektesedi. Sondaı-aq, Taıland ókilderi mundaı keń aýqymdy sharany uıymdastyrýdyń joǵary deńgeıin atap ótti.
Taıland Koróldigi Mádenıet mınıstrliginiń Din isteri departamentiniń ókilderi óz kezeginde, konfesıaaralyq kelisimdi qamtamasyz etýdiń ulttyq tetikteri týraly baıandady. Qazirgi tańda Koróldikte 15 dinı uıymdar resmı tirkelgen, al memleket moıyndaǵan negizgi dinder býddızm, ıslam, ındýızm, sıkhızm jáne hrıstıan bolyp tabylady.
Tusaýkeserden keıin jemisti pikirtalas ótip, onyń barysynda is-sharaǵa qatysýshylar túrli dinder men mádenıetter arasyndaǵy dıalogty damytý ózektiligi, sondaı-aq bul turǵydaǵy Astanada ótken sıez róliniń mańyzdylyǵy týraly kelisimge keldi.
Erkin QALDAN
